Ek is op soek na :

STRYDOM-BROERS SKITTER IN SKAAK

		Twee Brandwagters, Ronnie en Danie Strydom, het uitstekend gevaar by Brandwag se Skaak-Ope. Danie het die eerste plek in die o/18 liga behaal terwyl Ronnie 'n derde plek behaal het in die ope-afdeling. Dit is 'n uitsonderlike prestasie vir Ronnie as gr. 9-leerder om al teen volwassenes deel te neem en so goed te vaar. Op die foto links is Ronnie in aksie tydens die skaak-ope.

GRYS EN GROEN KLOP GREY

		Viljee Kruger het 'n ware kapteinsbeurt gespeel toe hy ten spyte van 'n besering 33 lopies aangeteken het in die 1ste krieketspan se oorwinning oor Grey. Franz Botha het ook 33 onoorwonne lopies bygedra. Grey het eerste gekolf en 99 lopies aangeteken. Brandwag se beste boulers was Mario Mowers (3/20 in 6 beurte), Franz Botha (3/7 in 5 beurte) en Henk Conradie (0/13 in 8 beurte). Franz Botha en Corrie Clasen het elk twee vangskote geneem en Schalk Conradie het twee kolwers uitgehardloop. Viljee Kruger het ook twee kolwers gestonk. Brandwag wen die kragmeting met sewe paaltjies.

INTERLAER 2010


		De Wet het weereens koning gekraai in die interlaer-atletiek wat Vrydag 29 Januarie in bloedige hitte plaasgevind het. In 'n tradisie wat uit 1937 dateer het die dirigente vroegoggend 'n indrukwekkende skouspel opgedis. Retief was daredevils, Kruger cowboys en De Wet was 'n klomp ayoba sokkerspelers. Kruger was tweede en Retief derde. Op die foto is Eben Barnard, een van Brandwag se steratlete, eerste op pad na die wenpaal in die 200 meter.

MATRIEKS VAAR PUIK

		Brandwag se 2009 matrieks het weereens puik resultate in die eindeksamen opgelewer. Die matrieks het 'n 99% slaagsyfer en altesaam 219 A-vaksimbole behaal. Altesaam vier leerders spog met 6 A's, drie leerders het 5 A's, ses het 4 A's en 11 het elk 3 A's. Vyf 2009 matrieks het A gemiddeldes behaal. Van die skool se 201 matrieks het 102 matriekulasievrystelling behaal. Audrey Lötter is Brandwag se beste matriekpresteerder vir 2009 en spog met 6 A's en 'n gemiddeld van 87,3%. Ewald Els en Deanné Nolte was die skool se tweede en derde beste presteerders.

AUDREY IS EERSTE

		Audrey Lötter is nie net Brandwag se top matriek van 2009 nie, sy is ook op 'n gala-aand in Oos-Londen as die Uitenhage-distrik se beste matriekpresteerder aangewys. Die Uitenhage-distrik bestaan uit 27 skole en sluit skole so ver as Humansdorp en die Langkloof in. Audrey het 6 A-simbole behaal en 'n gemiddeld van 87,3%. Vir die prestasie is Audrey 'n lywige beurs van R50 000 per jaar aangebied. Sy het ook reeds 'n beurs-aanbod van die Nelson Mandela Metropolitaanse Universiteit gekry waar sy beplan om in 2010 B.Rek te studeer.

Welkom by Brandwag

Die Hoërskool Brandwag is 'n Afrikaans-medium skool geleë in Uitenhage. Brandwag is in die eerste plek 'n akademiese instelling, soos wat uitstekende matriekuitslae jaar na jaar bevestig. Die skool bied leerders 'n besondere wye vakkeuse. Toegewyde onderrigpersoneel help leerders om na die beste van hul vermoë te presteer in 'n omgewing waar akademie voorkeur geniet.

Brandwag bied ook op sport- en kultuurgebied allerlei geleenthede aan leerders. 'n Groot aantal aktiwiteite gee leerders verskeie opsies vir deelname, prestasie en pret. Jaarliks lewer Brandwagters uitstekende prestasies op sport- en kultuurgebied, waarvoor Brandwag wyd en syd bekend is. Prestasie is egter nie die enigste maatstaf van sukses vir die skool se buitemuurs nie. Wat leerders in lewenservaring en vreugde in kultuur en sport beleef, is iets wat elke deelnemer na die grootmenswêreld saam neem.

Daar is min plekke waar so baie op een slag gebeur soos by Brandwag. Onderwysers wat van elders by Brandwag aansluit, staan dikwels verstom oor die pas waarteen verkeie projekte gelyktydig plaasvind. Harde werk is die kern van die skool se sukses op soveel gebiede. Leerders leer by Brandwag wat dit beteken om besig en betrokke te wees. By Brandwag is daar nooit 'n vervelige oomblik nie.

Verskeie tradisies leef al oor dekades in die skool voort. Oudleerders sal onder meer interlaeroptogte, koshuisbyname, saalbyeenkomste, big brags en die oorneem van die stoep nog erken soos wat dit huidiglik gedoen word. Die oorlewing van verskeie tradisies het 'n groot aandeel in die gees wat in die skool heers. Dit alles dra by tot 'n onvergeetlike hoërskoolervaring in Brandwag.