Die Brandwag Hoërskool

Die Hoërskool Brandwag is ’n Afrikaans-medium hoërskool vir seuns en meisies geleë in Kariega, in die Oos-Kaap.

Toegewyde onderrigpersoneel help leerders om na die beste van hul vermoë te presteer en bou saam met leerders aan hulle selfvertroue, selfdissipline en selfrespek.

Brandwag bied ook op sport- en kultuurgebied verskeie geleenthede – vir prestasie, maar ook vir deelname en pret.

Alhoewel Brandwagters jaarliks uitstekende prestasies op akademiese, sport- en kultuurgebied lewer, is prestasie nie die enigste maatstaf van sukses nie. Wat leerders in lewenservaring en vreugde in die klas, by kultuuraktiwiteite en op die sportveld beleef, is iets wat elkeen na die grootmenswêreld saamneem en bydra tot ’n onvergeetlike hoërskoolervaring.

Verskeie tradisies leef al oor dekades in die skool voort. Oudleerders sal, onder meer, interlaeratletiek, koshuisbyname, big brags en die matriekstoep, uit hul eie skooldae onthou. Tradisie is ’n belangrike deel van die skool se kultuur.

Brandwag se klaskamers is toegerus met gesofistikeerde tegnologie. Die skool staan trots op ’n groot kampus met moderne fasiliteite.

Wat ouers en hul kinders by Brandwag sal vind, is ’n skool toegerus met geriewe wat ’n mens in ’n stad verwag tesame met die skoolgees en samehorigheid wat met plattelandse kosskole geassosieer word.

Dít is wat ons die Band van Grys en Groen noem.