Anke Alberts (links op die foto) en Kaylene Hiscock is gekies vir die o.14- OP-netbalspan wat van 23 tot 26 September aan die All Ages-toernooi gaan deelneem.

Twee van Brandwag se redenaars het uitgeblink in die Oos-Kaapse deel van die ATKV-redenaarskompetisie. Pearl Bucwa het in die afdeling vir Afrikaans Eerste Addisionele Taal die vierde plek in die provinsie behaal. By die juniors het Mirandé Filmalter die tiende posisie in die Oos-Kaap behaal.

’n Leerling, Mirali Hoekstra, het onlangs die graad 8-afdeling van LitNet se Skole-skryfkompetisie met Fanie Viljoen, gewen. Mirali se opstel, “My genesing” kan gelees word by https://www.litnet.co.za/hier-is-die-wenners-van-litnet-se-skole-skryfkompetisie-met-fanie-viljoen/. Sy het ook vroeër vanjaar die Associated Board of the Royal Schools of Music se graad 6-eksamen in klavier met lof geslaag. Sy het 132 uit 150 punte behaal.

’n Graad 8-leerling van Brandwag, Lourens Preller, het onlangs aan die derde ronde van die nasionale Wiskunde Olimpiade deelgeneem. Lourens was een van slegs vier leerlinge in die Oos-Kaap wat gekies is om aan die derde ronde deel te neem en net twee uit die vier Oos-Kapenaars wat gekies is, is in graad 8.

Die 2021 Mnr. en Mej. Brandwag is onlangs op ’n ietwat anderse manier, maar net so stylvol soos altyd, aangewys.

Vanjaar is die gala-aand in die opelug in die skool se vierkant gehou. Alhoewel slegs ’n beperkte aantal toeskouers die glansaand kon bywoon, is die verrigtinge regstreeks via die Internet uitgesaai. Kaartjies om die vertoning aanlyn te geniet, is vooraf verkoop. Vir die eerste keer kon mense van oraloor die wêreld dus die vertoning sien. Onder leiding van Gail Brown van Sophisticate Models het Brandwag se deelnemers weereens geskitter, dié keer onder die sterre.

Eindelik is Regardt Oosthuysen en Imigan Hiscock as Mnr. en Mej. Brandwag aangewys. Mnr. en Mej. Brandwag Junior is Ruan Meyer en Miecke Viviers.

Altesaam 14 hokkiespelers van Brandwag het vir hulself ’n plek oopgespeel in ’n toerspan wat later vanjaar in Nederland gaan hokkie speel.

Brandwag het onlangs met die hulp van Elsie Coetser van die Elsie Coetser Hokkieskool in Bloemfontein ’n hokkiekliniek vir die skool se o.16A- en o.18A-spanne aangebied. Coetser is bygestaan deur Gys van Schalkwyk en Tanya Britz, albei afrigter by die Oranje Meisieskool, ook in Bloemfontein. Dié afrigters kies na afloop van so ’n twee dae lange kliniek gewoonlik vyf belowende spelers vir ’n Oos-Kaap-skolespan wat beplan om in September na Europa te toer.

Coetser-hulle was egter so beïndruk met die hoë standaard van Brandwag se hokkiespelers dat hulle 14 spelers gekies het.

Twee graad 11-meisies van die Hoërskool Brandwag is gekies vir die Suid-Afrikaanse kragoptelspan nadat hulle uitstaande prestasies by die SA Borsopdruk-kampioenskap gelewer het. Dié kampioenskap is onlangs by Kaap Recife-skool beslis.

Heike Groenewald het in die o.69 kg-afdeling deelgeneem en met ’n gewig van 57,5 kg die eerste plek behaal en ook ’n nuwe Suid-Afrikaanse rekord opgestel.

Anika Ferreira het in die o.63 kg-divisie deelgeneem en ook 57,5 kg gelig, wat aan haar ook ’n eerste plek in haar gewigsafdeling besorg het.

Albei meisies is nou ingesluit by die Protea-span wat later vanjaar aan die Afrika Kampioenskap (Junie in Potchefstroom), die Wêreldkampioenskap (Oktober in Kazakhstan) en die Statebondspele (Desember in Nieu Seeland) gaan deelneem. Op die foto wys Anika (links) en Heike die medaljes en trofeë wat hulle verower het.  

Brandwag se klas van 2020 het hulle voorgangers oortref met 188 A-vakgemiddeldes (teenoor 2019 se 135) en 78% van die 2020-matrieks het toelating tot graadstudie verwerf (teenoor 69,5% in 2019).

Die slaagsyfer is 97,4%. Brandwag se toppresteerder, Demi Jonck, het ses A’s en ’n gemiddeld van 90,1% behaal. In die tweede plek is Chrisné Swanepoel met 7 A’s en ’n gemiddeld van 89,1%. Charné Allers beklee die derde plek met 7 A’s en 85,7%. Ook Suné Serfontein in die vierde plek het 7 A’s behaal en haar gemiddeld is 84,7%. Verder het Louise Beukes (vyf A’s en 83,1%), Ria Williams (vier A’s en 81,6%), Kelly-Lee Claassen (drie A’s en 80,9%) en Eaden Tait (drie A’s en 80,4%) almal A-gemiddeldes behaal. Anja de Beer en Ané Heunis tel ook onder die toppresteerders met vier A’s elk.

Brandwag se 2020-matrieks het 17 A-simbole vir Afrikaans en 15 vir Engels ingesamel.

Op die foto ontvang Josh Hermans in graad 8 ‘n kers en ‘n brosjure oor hoe om ’n Brandwagter te wees vanaf die skoolhoof, mnr. Zietsman. Elke graad 8-leerling aan die Hoërskool Brandwag kry ’n kers op hulle eerste skooldag as ’n simbool van kennis en lig op hulle pad gedurende hulle hoërskooljare.

Sewe entoesiastiese nuwe onderwysers en ’n onderwysstudent het aan die begin van die jaar by die personeel van die Hoërskool Brandwag aangesluit. Van links is Danell Bester (wiskunde en natuurwetenskap), Réze Opperman (rekeningkunde en ekonomiese bestuurswetenskap), Daniélle Skog (Engels), Gerrie Vorster (geografie en toerisme), Kaylin Kapp (onderwysstudent), Lise Siebert (verbruikerstudies) en Hayden Davis (geskiedenis). Bester en Davis is Brandwag-oudskoliere wat hulle aansluit by dertien ander oud-Brandwagters op die personeel. ’n Nuwe personeellid in die Engelsdepartement, Maryke van der Walt, sal later vanjaar die tuig opneem.